Listahátíð í Reykjavík fer fram 30. maí - 14. júní 2026.

VALMYND

Brim og Listahátíð í Reykjavík hafa skrifað undir samning þess efnis að Brim verði bakhjarl Listahátíðar til ársins 2028.

Guðmundur Kristjánsson, forstjóri Brims, og Lára Sóley Jóhannsdóttir, listrænn stjórnandi Listahátíðar, skrifuðu undir samkomulagið fyrr í dag.

„Það er mikið fagnaðarefni að Brim verði bakhjarl Listahátíðar. Samstarfið veitir hátíðinni mikilvægt svigrúm þegar kemur að dagskrárgerð og framboði viðburða án endurgjalds. Á Listahátíð í ár koma fram hátt í 1300 flytjendur á öllum aldri, víða að úr heiminum, úr öllum hverfum borgarinnar og landshlutum. Það er afar dýrmætt að finna fyrir áhuga og vilja Brims til þess að vera virkur þátttakandi í að efla Listahátíð og þau áhrif sem hátíðin hefur,“ segir Lára Sóley.

„Við í Brimi viljum vera virkir og öflugir þátttakendur í samfélaginu. Það gerum við með því sinna vel okkar störfum, skapa verðmæti og auka þannig framlag okkar. Við kjósum einnig að styðja margt þess utan sem horfir til framfara. Listahátíð í Reykjavík gefur okkar listafólki tækifæri til að spreyta sig á meðal þeirra bestu og almenningur hér heima nær að skynja ferska vinda í heimi lista. Við í Brimi trúum því að þannig verði framfarir og þannig eflist okkar samfélag. Við róum öll í sömu átt,“ segir Guðmundur Kristjánsson.

Listahátíð í Reykjavík 2026 fer fram dagana 30. maí til 14. júní. Viðburðir verða víða í borginni og á ýmsum stöðum í landsbyggðunum. Heildardagskrá hátíðarinnar verður kynnt næstkomandi föstudag, 27. mars. Meðal þess sem má finna á dagskrá hátíðarinnar er fjórir viðburðir tengdir Hildi Guðnadóttur sem jafnframt er hátíðarlistamaður, áttunda sinfónía Mahlers í flutningi Sinfóníuhljómsveitar Íslands, sýning úkraínska listahópsins Open Group í Nýlistasafninu, leiksýning rúönsku kvennatrommusveitarinnar Ingoma Nshya og stórtónleikar John Grant í Hörpu.

Brim verður bakhjarl Listahátíðar í Reykjavík

Í gær var skrifað undir samstarfssamning Landsbankans og Listahátíðar í Reykjavík þess efnis að Landsbankinn verði bakhjarl hátíðarinnar til ársins 2028.

Sara Pálsdóttir, framkvæmdastjóri Samskipta og menningar hjá Landsbankanum, og Lára Sóley Jóhannsdóttir, listrænn stjórnandi Listahátíðar, skrifuðu undir samkomulagið.

„Samstarfið við Landsbankann er okkur afar mikilvægt. Það er ánægjulegt að vinna með öflugum bakhjarli sem hefur verið til fyrirmyndar þegar kemur að stuðningi við menningarlífið í landinu. Stuðningurinn veitir okkur tækifæri til þess að efla Listahátíð enn frekar og bjóða landsmönnum öllum og erlendum gestum upp á framúrskarandi og fjölbreytta dagskrá. Við vinnum að því að Listahátíð nái til sem flestra og höfum lagt okkur eftir því að sníða dagskrána þannig að allir finni eitthvað við sitt hæfi,“ segir Lára Sóley.

„Við erum afar spennt fyrir að taka þátt í þessu flotta verkefni og hlökkum til að mæta á viðburðina. Landsbankinn hefur verið öflugur stuðningsaðili menningar og lista í gegnum árin. Nú nýlega höfum við lagt HönnunarMars lið, boðið upp á listaverkagöngur á Menningarnótt og stutt ýmsa minni menningarviðburði víðs vegar um landið, bæði með styrkjum og beinni þátttöku. Þá er listaverkavefur bankans framtak sem miðar að því að sem flestir fái að njóta listmuna í eigu bankans. Hús Landsbankans við Reykjastræti 6 er í menningarhjarta borgarinnar og það er okkur afar mikilvægt að taka virkan þátt, auk þess sem við njótum þess að hrífast með,“ segir Sara.

Listahátíð í Reykjavík 2026 fer fram dagana 30. maí til 14. júní. Viðburðir verða víða í borginni og á ýmsum stöðum á landsbyggðinni. Heildardagskrá hátíðarinnar verður kynnt á sérstökum viðburði í Iðnó, fimmtudaginn 26. mars. Hátíðarlistamaður Listahátíðar 2026 er Hildur Guðnadóttir og verða fjórir viðburðir tengdir henni á dagskrá. Meðal annarra viðburða sem tilkynnt hefur verið um eru tónleikar sópransöngkonunnar Angel Blue, sýningar Bjarkar Guðmundsdóttur og James Merrys í Listasafni Íslands, tónleikar John Grants, sýning Zimouns í Listasafninu á Akureyri og flutningur Sinfóníuhljómsveitar Íslands á 8. sinfóníu Mahlers.

Landsbankinn bakhjarl Listahátíðar í Reykjavík

Ragnheiður Maísól Sturludóttir og Jón Haukur Unnarsson hófu störf sem verkefnastjórar hjá Listahátíð í Reykjavík nú í janúar.

Ragnheiður Maísól er með BA gráðu í myndlist og MA gráðu í hagnýtri þjóðfræði. Frá 2013 hefur hún starfað við fjölbreytta menningarframleiðslu samhliða eigin listsköpun en hún er ein af stofnendum MurMur Productions. Hún var listrænn stjórnandi Listar án landamæra 2017 - 2019, framkvæmdastjóri Myrkra músíkdaga 2021 og Flipp Festival 2023 og vann í markaðsmálum fyrir HönnunarMars 2022 og 2023. Hún hefur aðallega starfað innan sviðslista og hefur komið að framleiðslu yfir 20 sjálfstæðra leikverka. Má þar m.a. nefna Club Romantica, óperuna KOK, Sæskrímslin - opnunarverk Listahátíðar 2024 og Innkaupapokann.

Jón Haukur er listamaður og menningarstjórnandi frá Akureyri sem hefur verið virkur í listrænu starfi frá 2010. Hann nam slagverk og hljóðtækni hérlendis, í Listaháskólanum í Havana og SAE Institute í Berlín og er nú að ljúka MA námi í menningarstjórnun við Háskólann á Bifröst. Hann er forsprakki menningarhátíðarinnar Mannfólkið breytist í slím, einn af stjórnendum dansmyndahátíðarinnar Boreal Screendance Festival og hefur unnið sem verkefnastjóri sumarhátíða hjá Akureyrarbæ. Á skapandi ferli hefur Jón Haukur fengist við trommu- og slagverksleik auk þess að sinna tónsmíðum, upptökum og framleiðslu á tónlist, hljóðvinnslu og skipulagningu viðburða. Þá hefur hann einnig flutt samtímadans og gjörninga.

Hátíðin býður þau velkomin í teymið og hlakkar til samstarfsins.

Takk fyrir frábærar móttökur!

Aðrar fréttir

Brim verður bakhjarl Listahátíðar í Reykjavík

Landsbankinn bakhjarl Listahátíðar í Reykjavík

Teymi Listahátíðar stækkar