Listahátíð í Reykjavík fer fram 1. - 16. júní 2024.

VALMYND

Loksins er komið að því - við kynnum með mikilli tilhlökkun dagskrá hátíðarinnar 1.-16. júní næstkomandi.

Dagskráin er stútfull af spennandi viðburðum af ýmsum toga og hátíðin teygir sig langt út fyrir borgarmörkin. Langar þig að ganga inn í alltumlykjandi myndlistarverk, elta sæskrímsli um höfnina, heyra glæný tónverk, horfa á hrífandi danssýningu, ganga um náttúruna með hljóðverk í eyrunum, hlusta á heimsfrægt tónlistarfólk - eða kannski allt þetta? Þú finnur eitthvað sem kitlar á dagskrá Listahátíðar í ár.

Smelltu hér til að skoða rafrænt eintak af kynningarritinu okkar sem verður svo líka hægt að næla sér í víðsvegar um borgina.

Í vorhretinu yljum við okkur við tilhugsunina um sólríkt menningarsumar og kynnum fjölbreytta flóru myndlistar á Listahátíð 2024!
Á dagskrá hátíðarinnar í ár, 1.-16. júní, ættu allir unnendur myndlistar að finna eitthvað við sitt hæfi. Mikill fjöldi af frábæru listafólki kemur þar að og innsetningar, skúlptúrar, ljósmyndasýningar, hljóðverk og heilu hátíðirnar munu skjóta upp kollinum á söfnum höfuðborgarsvæðisins og raunar um land allt.

Listasafn Reykjavíkur heldur fyrstu einkasýningu listamannsins Jónsa í Evrópu, Flóð, en alltumlykjandi tónlistarinnsetningar hans munu opna gestum nýja heima allt frá fyrsta degi hátíðarinnar. Við Tjörnina bjóða þær Anna Andrea Winther og Agnes Ársæls upp á list fyrir fólk og fugla undir heitinu Á milli mála - Fiður, fingur, fálmarar. Kostulegir skúlptúrar Auðar Lóu Guðnadóttur birtast í Gallerí Úthverfu á Ísafirði en sýning hennar nefnist Í lausu lofti. Í Sláturhúsinu á Egilsstöðum flétta þær Agnieszka Sosnowska og Ingunn Snædal saman ljósmyndir og ljóð á sýningunni Rask. Í Listasafninu á Akureyri verður haldið í listræna könnunarferð um norðurslóðir á stóru samsýningunni Er þetta norður? Gróskuríkt menningarstarfið í Alþýðuhúsinu á Siglufirði hreppti Eyrarrósina 2023-24 og þar verður haldin þriggja daga alþjóðleg listahátíð, INTO Festival. Í umbreyttu stýrishúsi á Seyðisfirði, Kiosk 108, fer fram tónlistar- og gjörningahátíð undir stjórn Moniku Fryčová. Gámur á vegum Ásmundarsals mun flakka um borgina undir heitinu Hringferð í Smástundarsal en þar má upplifa innsetningu listakvennanna Shu Yi og Þórdísar Erlu Zoëga. Tumi Magnússon sýnir Hringrás, nýja vídeó- og hljóðinnsetningu, í Listasafni Íslands. Tvær einkasýningar verða í boði í Kling & Bang, annars vegar Óþægileg blæbrigði Magnúsar Sigurðarsonar og hinsvegar Silfurgjá, sýning Guðrúnar Mörtu Jónsdóttur. Nýlistasafnið stendur að samsýningunni Rás þar sem höfðað er sérstaklega til eyrna gestanna. Listakonan Yuliana Palacios sýnir nýja vídeóinnsetningu í Gerðarsafni, Hér á ég heima. Í Norræna húsinu verður boðið upp á alþjóðlegu samsýninguna (Post) þar sem listakonur takast á við mannöldina. Einkasýning Þorgerðar Ólafsdóttur, Brot úr framtíð, fer fram í Þjóðminjasafni Íslands.

Heildardagskrá hátíðarinnar verður svo kynnt eftir páska - fylgist með ...

Annað hvert ár veitir Listahátíð í Reykjavík, í samstarfi við Byggðastofnun og Icelandair, verðlaun fyrir framúrskarandi menningarstarfsemi á landsbyggðinni. Handhafi Eyrarrósarinnar 2023-24 er menningarstarfsemin í Alþýðuhúsinu á Siglufirði.

Í rúman áratug hefur Aðalheiður S. Eysteinsdóttir leitt starfsemina í Alþýðuhúsinu sem hefur sannarlega haft gildi bæði fyrir nærsamfélagið og íslenskt menningarlíf. Í húsinu blómstrar víðtækt menningarstarf. Aðaláherslan er á myndlist en undir hatti starfseminnar rúmast einnig ýmis skapandi samstarfsverkefni, þrjár stórar listahátíðir, jaðartónlistarviðburðir, listasmiðjur og vettvangur þar sem kraftmikið fólk getur hrundið eigin hugmyndum í framkvæmd.

Dagana 7. -9 júní mun Alþýðuhúsið standa að alþjóðlegri hátíð, INTO Festival. Siglufjörður mun iða af sköpunarkrafti alla hátíðardagana en á dagskránni eru meðal annars myndlistarsýningar, gjörningar, útilistaverk, tónleikar og ljóðalestur. Viðburðirnir fara fram bæði í Alþýðuhúsinu og víðs vegar um bæinn, inni og úti. Aðgangur að öllum viðburðum er ókeypis.

Ítarlega dagskrá og upplýsingar um listafólkið má nálgast á heimasíðu Listahátíðar og síðu Alþýðuhússins.

Mikill fjöldi innlendra og erlendra farfugla hefur í sumar lagt leið sína á Listahátíðarsýningarnar Brennið þið, vitar!, sem stóðu frá setningarhelgi Listahátíðar um miðjan maí til mánudagsins 3. ágúst í fjórum vitum, einum í hverjum landshluta; Garðskagavita, Bjargtangavita, Kópaskersvita og Dalatangavita.

Í ágúst/septemberhefti menningartímaritsins DAMN er að finna áhugaverða grein undir yfirskriftinni „Light in the Darkness“ um sýningarnar fjórar, eftir Markús Þór Andrésson, sem jafnframt var sýningarstjóri Brennið þið, vitar! ásamt Dorothée Kirch. 

Stuttan inngang að greininni er að finna hér:

http://www.damnmagazine.net/magazines/current_issue

DAMN° er virt alþjóðlegt tímarit um samtímamenningu, sjálfstæð útgáfa þar sem mörkin á milli hönnunar, arkitektúr og lista eru ekki mörkuð á skýran hátt heldur könnuð.

Ljós í myrkrinu

Aðrar fréttir

Dagskrá 2024 kynnt!

Myndlistin á Listahátíð

Alþjóðleg hátíð á Siglufirði