Himna: Goðsagnir & skáldskapur úr jörðu

Á sýningunni Himnu er rýnt í endurnýjun jarðvegs sem gerir jörðina byggilega, kveikir líf og hlúir að því. Vísinda­legar og pósthúmanískar nálganir hníga í auknum mæli að því að jarðvegurinn sé sjálfstýrt, lifandi kerfi – kvikt samlífi fremur en dauð auðlind.

Hann styður við vöxt sem og mikilvæga hringrás niðurbrots og rotnunar. Hann er frjór vettvangur fyrir goðsagnir, getgátur og skáldskap samhliða vísindalegri þekkingu.

Sýningin leiðir saman hóp samtímalistamanna sem notast við ólíkar vinnuaðferðir en varpa ljósi á jarðveg sem lifandi minni og arkíf ólíkra tegunda.