Listahátíð í Reykjavík fer fram 30. maí - 14. júní 2026.

VALMYND

Listahátíð í Reykjavík óskar eftir hugmyndum að verkefnum frá listafólki sem hefur áhuga á að taka þátt í dagskrá hátíðarinnar 30. maí – 14. júní 2026. Við tökum á móti hugmyndum á öllum vinnslustigum en til að koma til álita er mikilvægt að stærri og fjárfrekari verkefni séu komin áleiðis með eigin fjármögnun.

Umfjöllunarefni Listahátíðar í Reykjavík 2026 eru tengsl. Hvernig tengjumst við sem samfélag umheiminum? Hvernig tengjumst við hvert öðru í okkar eigin samfélagi og umhverfi?

Við viljum tengja listafólk og áhorfendur, ólíkar listgreinar, landshluta og menningarheima. Tengsl hafa aldrei verið jafn mikilvæg.

Listahátíð leggur áherslu á frumsköpun og viðburði sem höfða til fjölbreyttra áhorfendahópa. Listahátíð er ekki bundin við höfuðborgarsvæðið og geta viðburðir farið fram um allt land.

List og menning eru ekki forréttindi fárra heldur réttur allra.

Við viljum heyra hugmyndir frá ólíku listafólki, að verkefnum sem henta í hefðbundin eða óhefðbundin rými og viljum að hátíðin endurspegli margbreytileika samfélags okkar.

Tillögur skulu sendar inn með því að fylla út rafrænt eyðublað hér.

 Skilafrestur er til miðnættis 16. apríl 2025.


Ef spurningar vakna varðandi umsóknareyðublaðið eða ferlið, vinsamlegast sendið okkur línu á artfest@artfest.is.

Ljósmynd: Dansarar úr Íslenska dansflokknum sýna úr verkinu While in battle I am free, never free to rest eftir Hooman Sharifi á opnun Listahátíðar 1. júní 2024 í Hafnarhúsi Listasafns Reykjavíkur. 
Ljósmyndari: Juliette Rowland

Hugmyndir óskast fyrir Listahátíð 2026!

Hvaða framúrskarandi menningarverkefni hlýtur Eyrarrósina 2025?

Listahátíð í Reykjavík, Byggðastofnun og Icelandair auglýsa nú í nítjánda sinn eftir umsóknum um Eyrarrósina, viðurkenningu sem veitt er framúrskarandi menningarverkefni í landsbyggðunum. Horft er til þess að verkefnið hafi fest sig í sessi, verið starfrækt í yfir þrjú ár og hafi áhrif á menningarlíf á sínu landssvæði.

Menningarstarf í Alþýðuhúsinu á Siglufirði hlaut Eyrarrósina árið 2023 en meðal fyrri verðlaunahafa má nefna Handbendi á Hvammstanga, Bræðsluna á Borgarfirði eystra, Skaftfell, Frystiklefann á Rifi, Aldrei fór ég suður, Ferska vinda í Garði, List í ljósi á Seyðisfirði og Skjaldborg á Patreksfirði.

Eyrarrósarhafinn hlýtur 2,5 milljón króna peningaverðlaun. Framleitt verður sérstakt myndband um verkefnið og því gefinn kostur á að standa að viðburði á aðaldagskrá Listahátíðar í Reykjavík 2026. 

Hvatningarverðlaun Eyrarrósarinnar

Hvatningarverðlaun Eyrarrósarinnar verða nú veitt í þriðja sinn til þriggja verkefna sem hafa eru nýleg eða enn í þróun en sýna faglegan metnað bæði í rekstri og listrænni sýn. Hver hvatningarverðlaun eru 750 þúsund krónur.

Verndari Eyrarrósarinnar er hr. Björn Skúlason, maki forseta Íslands

Umsóknarfrestur um Eyrarrósina og hvatningarverðlaun Eyrarrósarinnar er til kl. 16:00 mánudaginn 24. mars.

Allar nánari upplýsingar um fyrirkomulag Eyrarrósarinnar og umsóknareyðublað má finna á vef Listahátíðar: www.listahatid.is/eyrarrosin

Fjóla Dögg Sverrisdóttir hefur nú látið af starfi framkvæmdastjóra Listahátíðar í Reykjavík, starfi sem hún sinnti af mikilli fagmennsku í um 8 ár.

Fjóla átti í afar farsælu samstarfi við listræna stjórnendur hátíðarinnar og annað starfsfólk. Á starfstíma Fjólu hefur hátíðin tekið miklum breytingum og tók hún virkan þátt í að innleiða stefnur hátíðarinnar, þá síðast þar sem sérstök áhersla var lögð á aðgengi og inngildingu og umhverfismál.

Stjórn og listrænn stjórnandi Listahátíðar í Reykjavík þakka Fjólu fyrir afar gefandi og gott samstarf og óeigingjarnt framlag til hátíðarinnar.

Við óskum Fjólu alls hins besta á nýjum vettvangi.

Fjóla Dögg lýkur störfum hjá Listahátíð

Takk fyrir komuna á Listahátíð 2024

Aðrar fréttir

Hugmyndir óskast fyrir Listahátíð 2026!

Eyrarrósin - Auglýst eftir umsóknum

Fjóla Dögg lýkur störfum hjá Listahátíð