Listahátíð í Reykjavík fer fram 1. - 16. júní 2024.

VALMYND

Listahátíð leitar að vöskum sjálfboðaliðum! Okkur vantar sprækt og áreiðanlegt fólk til að aðstoða okkur við allt mögulegt á hátíðinni 1.-16. júní næstkomandi. Langar þig að upplifa Listahátíð innan frá og kynnast nýju fólki og menningu?

Listahátíð í Reykjavík vinnur eftir aðgengisstefnu og leitast við að endurspegla fjölbreytileika mannlífsins, hvort sem er um að ræða listafólk, starfsfólk eða sjálfboðaliða.

Smelltu hér til að fylla út eyðublað og sækja um að vera sjálfboðaliði á Listahátíð í Reykjavík 2024.

Listahátíð leitar að sjálfboðaliðum!

Loksins er komið að því - við kynnum með mikilli tilhlökkun dagskrá hátíðarinnar 1.-16. júní næstkomandi.

Dagskráin er stútfull af spennandi viðburðum af ýmsum toga og hátíðin teygir sig langt út fyrir borgarmörkin. Langar þig að ganga inn í alltumlykjandi myndlistarverk, elta sæskrímsli um höfnina, heyra glæný tónverk, horfa á hrífandi danssýningu, ganga um náttúruna með hljóðverk í eyrunum, hlusta á heimsfrægt tónlistarfólk - eða kannski allt þetta? Þú finnur eitthvað sem kitlar á dagskrá Listahátíðar í ár.

Smelltu hér til að skoða rafrænt eintak af kynningarritinu okkar sem verður svo líka hægt að næla sér í víðsvegar um borgina.

Í vorhretinu yljum við okkur við tilhugsunina um sólríkt menningarsumar og kynnum fjölbreytta flóru myndlistar á Listahátíð 2024!
Á dagskrá hátíðarinnar í ár, 1.-16. júní, ættu allir unnendur myndlistar að finna eitthvað við sitt hæfi. Mikill fjöldi af frábæru listafólki kemur þar að og innsetningar, skúlptúrar, ljósmyndasýningar, hljóðverk og heilu hátíðirnar munu skjóta upp kollinum á söfnum höfuðborgarsvæðisins og raunar um land allt.

Listasafn Reykjavíkur heldur fyrstu einkasýningu listamannsins Jónsa í Evrópu, Flóð, en alltumlykjandi tónlistarinnsetningar hans munu opna gestum nýja heima allt frá fyrsta degi hátíðarinnar. Við Tjörnina bjóða þær Anna Andrea Winther og Agnes Ársæls upp á list fyrir fólk og fugla undir heitinu Á milli mála - Fiður, fingur, fálmarar. Kostulegir skúlptúrar Auðar Lóu Guðnadóttur birtast í Gallerí Úthverfu á Ísafirði en sýning hennar nefnist Í lausu lofti. Í Sláturhúsinu á Egilsstöðum flétta þær Agnieszka Sosnowska og Ingunn Snædal saman ljósmyndir og ljóð á sýningunni Rask. Í Listasafninu á Akureyri verður haldið í listræna könnunarferð um norðurslóðir á stóru samsýningunni Er þetta norður? Gróskuríkt menningarstarfið í Alþýðuhúsinu á Siglufirði hreppti Eyrarrósina 2023-24 og þar verður haldin þriggja daga alþjóðleg listahátíð, INTO Festival. Í umbreyttu stýrishúsi á Seyðisfirði, Kiosk 108, fer fram tónlistar- og gjörningahátíð undir stjórn Moniku Fryčová. Gámur á vegum Ásmundarsals mun flakka um borgina undir heitinu Hringferð í Smástundarsal en þar má upplifa innsetningu listakvennanna Shu Yi og Þórdísar Erlu Zoëga. Tumi Magnússon sýnir Hringrás, nýja vídeó- og hljóðinnsetningu, í Listasafni Íslands. Tvær einkasýningar verða í boði í Kling & Bang, annars vegar Óþægileg blæbrigði Magnúsar Sigurðarsonar og hinsvegar Silfurgjá, sýning Guðrúnar Mörtu Jónsdóttur. Nýlistasafnið stendur að samsýningunni Rás þar sem höfðað er sérstaklega til eyrna gestanna. Listakonan Yuliana Palacios sýnir nýja vídeóinnsetningu í Gerðarsafni, Hér á ég heima. Í Norræna húsinu verður boðið upp á alþjóðlegu samsýninguna (Post) þar sem listakonur takast á við mannöldina. Einkasýning Þorgerðar Ólafsdóttur, Brot úr framtíð, fer fram í Þjóðminjasafni Íslands.

Heildardagskrá hátíðarinnar verður svo kynnt eftir páska - fylgist með ...

Ertu tæknitýpa? Finnst þér gaman að taka þátt í að skapa skemmtilega stemmningu?

Hefurðu einstakt auga fyrir sjónarhornum og augnablikum?

Listahátíð í Reykjavík býður upp á fjölbreytta listviðburði innan- sem utandyra; tónleika, sviðslista- og myndlistarsýningar, námskeið, partý, umræður og fleira. 

Listahátíð í Reykjavík vinnur eftir aðgengisstefnu og leitast við að endurspegla fjölbreytileika mannlífsins bæði meðal listafólks hátíðarinnar og í hópi starfsfólks.

TÆKNIFÓLK ÓSKAST Í KLÚBB LISTAHÁTÍÐAR
Klúbbur Listahátíðar leitar að tæknimanneskjum til að sjá um tæknikeyrslu á spennandi og fjölbreyttri dagskrá í Iðnó í júní. Um er að ræða samtals 80 klst í verktöku, blöndu af dag- og kvöldvinnu, sem dreifast á opnunartíma Klúbbsins 1.-16. júní. Greiddar eru 7.500 krónur fyrir tímann + VSK (9.300 kr. með VSK).  

Klúbbur Listahátíðar hýsir fjölbreytta listviðburði; umræður, námskeið, sýningar, tónleika og partý fyrir alla aldurshópa. Klúbburinn er einnig vettvangur samtals og fyrir óformlegri tækifæri til að tengjast, kynnast nýju fólki og hugmyndum. Verkefnastjórar Klúbbsins eru Aude Busson og Sigurður Starr. Tæknifólk Klúbbsins þarf að hafa góða þekkingu á hljóðvinnu og reynslu af ljósavinnu, vera lausnamiðað og með ríka þjónustulund.

Menntun og/eða mikil reynsla af hljóðvinnu

Reynsla af tæknivinnu í Iðnó er kostur

Vinsamlegast sendið póst fyrir 24. mars á artfest@artfest.is þar sem reynsla og hæfni koma fram ásamt dæmum um síðustu verkefni í hljóð-/ ljósavinnu.

Listahátíð í Reykjavík leitar að ljósmyndurum til að mynda spennandi og fjölbreytta dagskrá frá 1. til 16. júní. Ljósmyndarar skipta með sér rúmlega 60 viðburðum sem fara fram á mismunandi tímum dags yfir hátíðartímann. Ljósmyndum er skilað jafn óðum til kynningarstjóra hátíðarinnar.

Enskukunnátta skilyrði                                   

Menntun og/eða reynsla af viðburðaljósmyndun

Vinsamlegast sendið stutta ferilskrá og dæmi um viðburðaljósmyndir ykkar fyrir 24. mars á kara@artfest.is.

Tæknifólk og ljósmyndarar óskast

Aðrar fréttir

Listahátíð leitar að sjálfboðaliðum!

Dagskrá 2024 kynnt!

Myndlistin á Listahátíð