Nefndur Brandur skilaði skóhlífunum aftur

„Símon Sveinbjarnarson Hverfisgötu 93 kærir Brand Alexander Brandsson Hverfisgötu 88 fyrir að hafa stolið skóhlífum úr húsi sínu. Þær hafi farið á 10 mínútum og engin komið annar í húsið. Nefndur Brandur skilaði skóhlífunum aftur og viðurkenndi að hafa tekið þær í nefndu húsi.

Kært yfir rúðubroti í húsinu nr. 3 við Fischersund kl. 1 um nóttina, engin grunaður.

Guðmundur Guðmundsson Seljalandi segir að Lárus í Versluninni „Hlíf“, Hverfisgötu 56, hafi stolið stígvélum, sem hann beiddi að selja sér, eða liggja hjá sér meðan Guðmundur færi ofan í bæ, en á meðan selur hann þau Elíasi Líndal, og er þar hjá honum í búðinni. Fór ég svo til Elíasar Líndal og sótti hin umræddu stígvél, með þeim ummælum að ég tæki þau til geymslu, meðan verið væri að athuga hvernig í þessu lægi og það þeir Guðmundur og Lárus jöfnuðu það á milli sín. Varð svo ekki frekara gert því Lárus fannst ekki.

Þá var athuguð kæra frá Einari Gunnarssyni á Elías S. Líndal fyrir að selja úr búð sinni vörur án seðla. Upplýst að það væri rétt og væru vitni að því Nicolai Þorsteinsson á Lindargötu 10, var í skúr á Grettisgötu, og Þórður Ingvarsson söðlasmiður á Óðinsgötu 1, sem keypti. Þorsteinn Kjarval sem nefndur var er ónítt vitni, hann keypti en lofaði að koma með seðil síðar, gaf skýrslu um þetta og afhenti lögreglustjóra."