Listahátíð í Reykjavík fer fram 1. - 16. júní 2024.

VALMYND

Stjórn Listahátíðar í Reykjavík hefur ákveðið að ráða Láru Sóleyju Jóhannsdóttur í stöðu listræns stjórnanda Listahátíðar í Reykjavík frá komandi hausti til fjögurra ára.

Lára Sóley lauk meistaragráðu í listastjórnun frá Royal Welsh College of Music and Drama árið 2019. Hún starfaði um árabil sem fiðluleikari og sjálfstætt starfandi verkefnastjóri. Á árunum 2010-2014 var hún verkefnastjóri við Menningarhúsið Hof og gegndi starfi framkvæmdastjóra Hofs í afleysingum. Lára Sóley hefur starfað sem framkvæmdastjóri Sinfóníuhljómsveitar Íslands frá árinu 2019.

„Ég er afar þakklát stjórn Listahátíðar fyrir traustið og einstakt tækifæri. Listahátíð í Reykjavík er mikilvæg og metnaðarfull hátíð sem byggir brýr milli ólíkra listgreina, listafólks og gesta. Hátíðin hefur áratugum saman auðgað menningarlíf okkar og fært okkur glæsilega viðburði, átt í samstarfi framúrskarandi listafólk og veitt tækifæri sem leitt hafa til framþróunar í menningarlífi landsmanna. Ég mun gera mitt allra besta til þess að hátíðin haldi áfram að vaxa og þroskast og veita okkur öllum tækifæri til þess að njóta þess besta og áhugaverðasta sem er að gerast í listalífi þjóðarinnar og umheimsins,“ segir Lára Sóley.

„Listahátíð í Reykjavík hefur í meira en hálfa öld verið mikilvægur þáttur í íslensku lista- og menningarlífi. Lára Sóley er fyrsti listræni stjórnandi hátíðarinnar sem kemur af sviði tónlistarinnar. Þaðan hefur hún víðtæka reynslu sem verður spennandi að sjá blómstra við stjórn Listahátíðar í Reykjavík. Lára Sóley tekur við af afar farsælum listrænum stjórnanda, Vigdísi Jakobsdóttur, og þakkar stjórn Vigdísi fyrir framúrskarandi starf í þágu hátíðarinnar,“ segir Sigtryggur Magnason, formaður stjórnar Listahátíðar í Reykjavík.

Starf listræns stjórnanda Listahátíðar í Reykjavík var auglýst samkvæmt skipulagsskrá til fjögurra ára og alls sóttu 18 um starfið. Vegna hagsmunatengsla sagði einn meðlimur stjórnarinnar sig frá aðkomu að ráðningarferlinu.

Nánari upplýsingar veitir Sigtryggur Magnason.

Lára Sóley listrænn stjórnandi Listahátíðar

Opnunardagur Listahátíðar í Reykjavík 2024 verður laugardaginn 1. júní og formleg setning fer fram í porti Hafnarhúss Listasafns Reykjavíkur kl. 14:00. Þar býður Lilja D. Alfreðsdóttir menningarmálaráðherra til móttöku og þær Vigdís Jakobsdóttir, listrænn stjórnandi Listahátíðar, og Ólöf Kristín Sigurðardóttir safnstjóri ávarpa gesti.

Við sama tilefni verður opnuð einkasýning Jónsa, Flóð, þar sem gestum býðst að ganga inn í alltumlykjandi hljóð-, ljós- og lyktarinnsetningar. Flóð er fyrsta einkasýning þessa magnaða listamanns í Evrópu.

Einnig kemur fram pólsk-úkraínska hljómsveitin DAGADANA sem heldur svo kraftmikla tónleika í Hörpu á sunnudagskvöldið.

Íslenski dansflokkurinn og dansarar úr street dance-senunni sýna brot úr verki Hoomans Sharifi, While in battle I’m free, never free to rest. Verkið verður frumsýnt í Borgarleikhúsinu 7. júní.

Flutt verður brot úr Dúettum, dansverki Ásrúnar Magnúsdóttur sem sýnt verður í Borgarleikhúsinu 9. júní.

Við Iðnó verður geggjuð hátíðarstemning en þar byrjar hljómsveitin Hnokkar að spila 14:40, sankar að sér gestum og gangandi og fer dansandi og spilandi yfir í Hafnarhús að sækja gesti úr móttökunni. Áfangastaðurinn er svo Miðbakki þar sem Sæskrímslin munu birtast okkur kl. 15:00. Þar er á ferðinni risastórt íslenskt götuleikhús fyrir alla fjölskylduna úr smiðju Hringleiks og Pilkington Props.

Listahátíð sett laugardaginn 1. júní!

Stjórn Listahátíðar í Reykjavík auglýsir samkvæmt skipulagsskrá hátíðarinnar laust starf listræns stjórnanda. 

Listrænn stjórnandi  er yfir stofnuninni og er ráðinn af stjórn hennar til allt að fjögurra ára í senn. Listrænn stjórnandi setur tóninn varðandi listræna stefnu hátíðarinnar og ber ábyrgð á framkvæmd hennar gagnvart stjórn. Við leitum að metnaðarfullum leiðtoga með gott listrænt innsæi.
 
Starfssvið:

Mótun listrænnar stefnu hátíðarinnar.

Ábyrgð og framkvæmd á fjárhagsáætlun hátíðarinnar, þ.m.t. eftirfylgni og uppgjör.

Heildarskipulag og yfirsýn hátíðarinnar.

Samningagerð við listafólk, stofnanir og styrktaraðila.

Eftirfylgni styrkumsókna og fjáröflun fyrir hátíðina.

Þátttaka í markaðs- og kynningarmálum.

Ýmis önnur verkefni sem listrænn stjórnandi hátíðarinnar sinnir.

Reynsla af stjórnun og rekstri, þ.m.t. áætlanagerð, kostnaðareftirliti og uppgjörum.

Reynsla af menningarstjórnun auk þekkingar og áhuga á listalífi hérlendis og erlendis.

Þekking á markaðssetningu og sölu viðburða.

Leiðtogahæfileikar og skapandi hugsun við verkstjórn og framkvæmd verkefna.

Góð hæfni í mannlegum samskiptum, metnaður og jákvætt viðmót.

Góð færni í íslensku og ensku í ræðu og riti.

Hæfni til að koma fram á innlendum og alþjóðlegum vettvangi og miðla upplýsingum á aðgengilegan hátt.

 
Listahátíð í Reykjavík var stofnuð árið 1970 og stendur fyrir alþjóðlegri listahátíð annað hvert ár. Hátíðin er í stöðugri þróun. Aðild að Listahátíð í Reykjavík eiga menningar- og viðskiptaráðuneytið, Reykjavíkurborg og fulltrúaráð sem er skipað helstu lista- og menningarstofnunum.

Umsókn um starfið skal fylgja ítarleg starfsferilsskrá og kynningarbréf á íslensku þar sem gerð er grein fyrir ástæðu umsóknar, rökstuðningi fyrir hæfni viðkomandi í starfið og listrænni sýn.

Umsóknarfrestur er til og með 18. júní nk.

Nánari upplýsingar um starfið veita Auður Bjarnadóttir (audur@vinnvinn.is) og Margrét Stefánsdóttir (margret@vinnvinn.is). 

Listrænn stjórnandi Listahátíðar í Reykjavík

Brynhildur Guðjónsdóttir stígur á svið í NASSIM!

Af óviðráðanlegum orsökum getur Ólafur Darri Ólafsson því miður ekki leikið sýninguna NASSIM eins og áætlað var þann 5. júní. 

En gestir þurfa ekki að örvænta – í hans stað kemur engin önnur en hin margrómaða Brynhildur Guðjónsdóttir, leikkona, leikstjóri og leikhússtjóri Borgarleikhússins. 

Brynhildur bætist í hóp hugrakkra stórleikara en auk hennar ætla þau Halldóra Geirharðsdóttir og Ingvar Sigurðsson að leika sína sýningu hvort af NASSIM, þar sem nýr leikari mætir til leiks á hverju kvöldi og fær hvorki að sjá handritið né æfa sýninguna fyrirfram!

Brynhildur Guðjónsdóttir í NASSIM

Aðrar fréttir

Lára Sóley listrænn stjórnandi Listahátíðar

Listahátíð sett laugardaginn 1. júní!

Listrænn stjórnandi Listahátíðar í Reykjavík