Where to From

Vinátta og listrænt samstarf til lengri tíma eru í forgrunni í nýjasta verki Hildar Guðnadóttur, Where to From. Um er að ræða níu einlæg og persónuleg verk sem út komu á samnefndri plötu hennar í október á vegum Deutsche Grammophon. Verkin verða flutt í stórbrotinni svið­setningu á tónleikunum í Silfurbergi ásamt öðrum lykil­verka Hildar sem samin eru á um 20 ára tímabili.

Hildur leikur á selló og syngur en með henni á sviðinu eru góðir vinir og samstarfsfólk til margra ára. Liam Byrne leikur á víólu da gamba, Clare O’Connell og Constance Ricard leika á selló, Sarah Saviet leikur á víólu og söng­konur eru þær Peyee Chen og Nina Guo.

Um verkið segir Hildur: „Ég er nánast alltaf með stöðugan straum af tónlist í höfðinu. Stundum tek ég strauminn upp og er hann þá eins konar skjáskot af tilfinningum mínum á þeim tímapunkti. Where to From er hljóðdagbókin mín.“ Where to From var pantað af Listahátíð í Reykjavík, Barbican Centre, Holland Festival og Vienna Konzerthaus.

Hildur Guðnadóttir er hátíðarlistamaður Listahátíðar í Reykjavík 2026. Þrír viðburðir verða á dagskrá hátíðarinnar þar sem tónlist Hildar er í fyrirrúmi.