Spjall um tónlist: Guðspjall Maríu

Hugi Guðmundsson kemur í spjall í Klúbbi Listahátíðar í tengslum við verk sitt Guðspjall Maríu, sem er á aðaldagskrá hátíðarinnar í Hallgrímskirkju um kvöldið. Ásamt honum verður einnig annar textasmiður verksins, Niels Brunse.

Guðspjall Maríu er ný og magnþrungin óratóría eftir Huga, eitt fremsta samtímatónskáld þjóðarinnar. Texti Parly og Brunse byggir á samnefndu riti frá fimmtu öld en talið er að því hafi verið haldið leyndu þar sem það stangaðist á við kristilegan rétttrúnað síns tíma. Guðspjall Maríu er óhefðbundin og framsækin túlkun á boðskap Jesú Krists sem vegferð til innri andlegrar visku á sama tíma og það hafnar þjáningum og dauða sem leiðum til eilífs lífs. Einnig er ýjað að því að María Magdalena hafi verið postuli sem hefur þótt eldfimur boðskapur. Þetta forna helgirit talar sterkt inn í okkar samtíma og tónskáldið lyftir guðspjallinu upp yfir stað og stund.

Verkið er flutt af framúrskarandi hópi tónlistarfólks þar sem saman koma Schola Cantorum, Oslo Sinfonietta og sópransöngkonan Berit Norbakken undir stjórn Harðar Áskelssonar en Hörður pantaði verkið sérstaklega hjá Huga fyrir hönd Listvinafélagsins í Reykjavík. Í gróskumiklu starfi sínu hefur félagið lagt áherslu á nýsköpun í listum og fjölmörg tónverk verið samin að tilstuðlan þess. Berit Norbakken er ein þekktasta sópransöngkona Noregs og hefur komið fram víða um heim við góðan orðstír, meðal annars í óperuhúsum Sydney og Tókýó.

Það er alltaf frítt inn og öll kærlega velkomin í Klúbbinn.

6. JÚN

Dagsetning

6. júní 2022, kl. 13:00-14:00

Staðsetning

Verð

Ókeypis

Listafólk

Hugi Guðmundsson, Niels Brunse

Aðgengi

Í Iðnó er gott aðgengi fyrir hjólastóla.

STRÆTÓ: 1, 3, 6, 11, 12, 13, 55

Merktu daginn