Listahátíð - Fréttir

BUIKA OG YANN TIERSEN Á LEIÐ Á LISTAHÁTÍÐ Í VOR

Thu, 9 Feb 2012 09:36:00 +0000

Dagskrá Listahátíðar í Reykjavík í vor er óðum að taka á sig mynd og nú hefur verið staðfest að franski tónlistarmaðurinn Yann Tiersen er á leið til landsins með hljómsveit og spilar í Hörpu 31. maí.

Einnig verður spænsk-afríska söngkonan Buika með tónleika ásamt hljómsveit í Hörpu 3. júní næstkomandi.

SAFNASAFNIÐ, SJÓRÆNINGJAHÚSIÐ OG VIÐ DJÚPIÐ TILNEFND TIL EYRARRÓSARINNAR 2012

Mon, 6 Feb 2012 10:46:00 +0000

Eyrarrósin, sérstök viðurkenning fyrir framúrskarandi menningarverkefni á landsbyggðinni, verður veitt í áttunda sinn á Bessastöðum laugardaginn 18. febrúar næstkomandi. Þrjú verkefni hafa verið valin úr metfjölda umsókna og hljóta tilnefningu til Eyrarrósarinnar í ár: Safnasafnið á Svalbarðsströnd, Sjóræningjahúsið á Vatneyri við Patreksfjörð.

Sjá fréttatilkynningu og umsagnir um verkefnin

VOLODOS KEMUR Á LISTAHÁTÍÐ Í VOR - MIÐASALA Í FULLUM GANGI

Sun, 5 Feb 2012 12:57:00 +0000

Miðasalan á einleikstónleika rússneska píanóleikarans Arcadi Volodos sem fram fara
í Hörpu, Eldborg, sunnudaginn 20. maí 2012, rýkur af stað.

SMELLTU HÉR TIL AÐ KAUPA MIÐA
Arcadi Volodos er talinn einstakur meðal píanóleikara og þykja tækni hans og tjáning óviðjafnanleg. Hann sver sig í ætt við gömlu meistarana hvað varðar frelsi í leik og tónmyndun. Að margra mati virðist tækni hans engin takmörk sett og hann á jafn auðvelt með að spila á tilfinningastrengi með undursamlegum einfaldleika og næmni og að framkalla stórkostlegar flugeldasýningar.

OPIN SAMKEPPNI UM VEGGSPJALD LISTAHÁTÍÐAR

Sat, 4 Feb 2012 10:35:00 +0000

Listahátíð , í samvinnu við Hönnunarmiðstöð, efnir til opinnar samkeppni meðal hönnuða og myndlistarmanna um veggspjald Listahátíðar í Reykjavík 2012. Þátttakendur hafa frjálsar hendur um útfærslu en hugmyndin er að hún veki tilfinningu fólks fyrir Listahátíð í Reykjavík sem haldin er árlega á vorin.

Úrslit samkeppninnar verða tilkynnt í upptakti að Hönnunarmars, þann 20. mars 2012 og opnuð sýning á völdum tillögum við það tækifæri. Höfundur verðlaunatillögu hlýtur verðlaun að upphæð 500.000 krónur.

Nánari upplýsingar og samkeppnislýsing

Tillögum skal skilað undir dulnefni í Hönnunarmiðstöð Íslands fyrir kl. 12.00 fimmtudaginn 23. febrúar 2012.

Opin samkeppni um hönnun veggspjalds er nýbreytni hjá Listahátíð, en í yfir fjörutíu ára sögu hennar hefur fjöldi hönnuða og myndlistarmanna verið valinn til að hanna veggspjöld sem fangað hafa tíðarandann og sett svip sinn á borgina á vorin. Hafa þau verið með ýmsu móti og ýmist tengst viðburðum, listamönnum og verkum Listahátíðar eða verið sjálfstæð hönnun.

RÚV SÝNIR ÞÁTTARÖÐ UM SAMVINNU TÓNSKÁLDA OG DANSHÖFUNDA Á LISTAHÁTÍÐ

Thu, 26 Jan 2012 10:03:00 +0000

TÓNSPOR er heitið á nýrri þáttaröð í umsjón Jónasar Sen, sem hefur göngu sína í Sjónvarpinu í kvöld. Þættirnir eru sex og er hver þáttur helgaður einu pari af tónskáldi og danshöfundi, sem unnu tón- og dansverk sem frumflutt voru á Listahátíð í Reykjavík í fyrra. Í þáttunum er fylgst með því hvernig verkin urðu til, frá fyrstu hugmynd til frumsýningar. Dagskrárgerð er í höndum Jóns Egils Bergþórssonar. Þættirnir eru samstarfsverkefni RÚV og Listahátíðar í Reykjavík.

Tónspor 1. þáttur: Sigríður Soffía Níelsdóttir og Þórarinn Guðnason - HORFA

Tónspor 2. þáttur: Hildigunnur Rúnarsdóttir og Steinunn Ketilsdóttir - HORFA

RÓMEÓ OG JÚLÍA EFTIR BERLIOZ Í FYRSTA SINN Á ÍSLANDI

Fri, 6 Jan 2012 16:04:00 +0000

"Hversu ákaft lifði ég meðan á tónsmíðunum stóð; af hvílíkri áfergju sigldi ég yfir hið mikla haf ljóðlistarinnar, undir hlýjum geislum þeirrar elskandi sólar sem Shakespeare hafði tendrað“, skrifaði Berlioz fullur andagiftar þegar hann hafði lokið við að semja þetta einstaklega frumlega og forvitnilega verk sem Sinfóníuhljómsveit Íslands ásamt einsöngvurum og kórum flytja í fyrsta sinn á Íslandi á Listahátíð í vor.

SMELLTU HÉR TIL AÐ KAUPA MIÐA

ÚTSENDING FRÁ TÓNLEIKUM KAUFMANN Á NÝÁRSKVÖLD

Sat, 31 Dec 2011 13:16:00 +0000

Listahátíð sendir ykkur öllum bestu óskir um gleðilegt ár og vill vekja athygli á sjónvarpsútsendingu frá Listahátíðartónleikum Jonasar Kaufmann og Sinfóníuhljómsveitar Íslands í Hörpu frá 21. maí. í Sjónvarpinu á nýárskvöld kl. 21.00.
Góða skemmtun.

GLEÐILEGA HÁTÍÐ

Wed, 21 Dec 2011 11:39:00 +0000

Listahátíð í Reykjavík óskar ykkur gleðilegra jóla og þakkar góðar stundir á árinu.

SMELLTU HÉR TIL AÐ OPNA KORTIÐ!

GEFÐU LISTAHÁTÍÐ Í GJÖF

Sun, 18 Dec 2011 21:53:00 +0000

Listahátíð í Reykjavík hefur til sölu falleg gjafakort sem gilda sem greiðsla á viðburði hátíðarinnar í vor sem haldin verður 18. maí – 3. júní 2012.

Hægt er að velja um gjafakort að upphæð 5.000, 10.000 og 15.000 krónur.

Gjafakortin eru send í pósti eða þau má nálgast á skrifstofu Listahátíðar í Gimli, Lækjargötu 3, sími 561 2444. Afgreiðslutímar alla virka daga frá kl. 9.00 til 16.00.

Hægt er að kaupa gjafakort hér

BERFÆTTA DÍVAN KVEÐUR

Sat, 17 Dec 2011 10:45:00 +0000

Söngkonan dáða frá Grænhöfðaeyjum, Cesária Évora, er látin sjötug að aldri.

Évora sótti Ísland tvívegis heim til að halda tónleika, fyrst á Listahátíð í Reykjavík árið 2000 og svo aftur árið 2002.

„Berfætta dívan“ naut hylli um allan heim með angurværum söng sínum og heillandi sviðsframkomu en hún hafði átt við alvarleg veikindi að stríða frá í haust.

STRENGUR TÓMASAR R. TILNEFNDUR TIL ÍSLENSKU TÓNLISTARVERÐLAUNANNA

Fri, 16 Dec 2011 14:54:00 +0000

Í dag voru kynntar tilnefningar til Íslensku tónlistarverðlaunnanna 2011. Meðal tilnefndra tónhöfunda ársins er Tómas R. Einarsson fyrir verk sitt Streng sem hann frumflutti á Listahátíð í Reykjavík í vor. Strengur var gefinn út á geisladiski og mynddiski í kjölfar hátíðarinnar og hlaut afbragðsdóma í íslenskum blöðum. Nýverið hafa einnig birst afar lofsamlegir dómar um Streng í erlendum fjölmiðlum.

SOLARIS Á TOPPLISTA TIMEOUT

Sun, 11 Dec 2011 12:07:00 +0000

Tímaritið TimeOut New York hefur útnefnt Sólaris eftir Daníel Bjarnason og Ben Frost sem eina af tíu bestu klassísku plötum ársins 2011.

Sinfóníetta Krakárborgar lék tónverkið ásamt Daníel og Ben á Listahátíð í Reykjavík í vor við kvikmyndaverk eftir Brian Eno. Upptakan kom út í nóvember hjá útgáfufyrirtækinu Bedroom Community og á heimasíðu þess er hægt að hlusta á brot úr verkinu. Hér má sjá lista Time Out.

JONAS KAUFMANN VALINN RÖDD ÁRSINS

Sat, 3 Dec 2011 11:42:00 +0000

Þýski tenórinn Jónas Kaufmann, sem hélt eftirminnilega tónleika á Listahátíð í vor, hlaut verðlaun Musical America í ár sem besta röddin.
Sjá verðlaunaafhendinguna hér sem haldin var í New York 5. desember.

TIL HAMINGJU GERÐUR KRISTNÝ OG BERGSVEINN

Fri, 2 Dec 2011 10:37:00 +0000

Gerður Kristný og Bergsveinn Birgisson eru tilnefnd til Bókmenntaverðlauna Norðurlandaráðs fyrir hönd Íslands, Gerður Kristný fyrir ljóðabók sína Blóðhófnir og Bergsveinn fyrir Svar við bréfi Helgu. Bæði hafa þau tekið þátt í Húslestrum á Listahátíð, Bergsveinn í vor og Gerður Kristný á Listahátíð 2009.
Listahátíð í Reykjavík óskar þeim innilega til hamingju með tilnefningarnar.

TIL HAMINGJU MEÐ DAG ÍSLENSKRAR TÓNLISTAR!

Thu, 1 Dec 2011 12:07:00 +0000

Dagur íslenskrar tónlistar er haldinn hátíðlegur í dag, 1. desember, og þá er íslenskri tónlist gert hátt undir höfði á öllum útvarpsstöðvum landsins og víðar.

Listahátíð í Reykjavík fagnar þessum degi enda hefur hún alla tíð lagt ríka áherslu á flutning íslenskrar tónlistar á hátíðinni. Íslensk tónlist hefur verið áberandi á hverri hátíð og hafa tónlistarmenn úr öllum geirum tónlistar samið og flutt verk fyrir tilstilli Listahátíðar alla tíð.

ÍSLENSK SAMTÍMAHÖNNUN - HELSINKI LOKAÁFANGASTAÐUR

Wed, 30 Nov 2011 12:24:00 +0000

Sýningin Íslensk samtímahönnun - húsgögn, vöruhönnun og arkitektúr opnaði fyrst á Listahátíð í Reykjavík á Kjarvalsstöðum í maí 2009. Sýningin er hönnuð sem farandsýning og hefur gert víðreist síðan. Hún opnar í Design Forum Finland í Helsinki, fimmtudaginn 1. desember, sem jafnframt er síðasti áfangastaður sýningarinnar.

LISTAHÁTÍÐ OG LANDSVIRKJUN ENDURNÝJA SAMSTARFSSAMNING

Mon, 28 Nov 2011 11:32:00 +0000

Hrefna Haraldsdóttir, listrænn stjórnandi Listahátíðar í Reykjavík og Hörður Arnarson, forstjóri Landsvirkjunar, undirrituðu í síðustu viku samning um að Landsvirkjun verði áfram einn af aðalsamstarfsaðilum hátíðarinnar.

Við þetta tækifæri lýstu báðir aðilar yfir ánægju með áframhaldandi samstarf en Listahátíð og Landsvirkjun hafa lengi átt farsælt samstarf og var Landsvirkjun einn af aðalsamstarfsaðilum hátíðarinnar árið 2011.

(Ó)SJÁLFSTÆTT FÓLK // (IN)DEPENDENT PEOPLE

Fri, 25 Nov 2011 11:17:00 +0000

Frumkvæði listamanna og samstarf

Listahátíð í Reykjavík í samstarfi við Listasafn Íslands, Listasafn Reykjavíkur, Nýlistasafnið, Norræna húsið og Kynningarmiðstöð íslenskrar myndlistar undirbýr nú umfangsmikið myndlistarverkefni fyrir Listahátíð 2012. Verkefnið hefur hlotið styrk úr norrænum sjóðum og hefur ráðið til sín sýningarstjórann Jonatan Habib Engqvist sem mun stýra verkefninu ásamt verkefnisstjóra, Kristínu Scheving.

AÐFÖR AÐ LÖGUM - MEGAS OG STRENGIR KOMNIR ÚT Á DISKI

Tue, 22 Nov 2011 10:23:00 +0000

Nú er kominn út hljómdiskurinn Aðför að lögum en hann inniheldur helstu perlur Megasar frá tónleikum Listahátíðar 2010 í strengjaútsetningum Þórðar Magnússonar og flutningi strengjaleikaranna Sigrúnar Eðvaldsdóttur, Bryndísar Höllu Gylfadóttur, Zbigniew Dubik, Helgu Þórarinsdóttur og Hávarðar Tryggvasonar.

SUMARTÓNLEIKAR Í SKÁLHOLTSKIRKJU Í ALÞJÓÐLEGU SAMSTARFI

Mon, 21 Nov 2011 11:25:00 +0000

Nýlega gekk hátíðin í samtök norrænna tónlistarhátíða og stofnana sem sérhæfa sig í flutningi tónlistar fyrri alda, Nordic Early Music, Federation (NORDEM). Það er mikil hvatning falin í aðild að samtökunum en um leið viðurkenning á því starfi sem hefur verið unnið. Samstarf á þessum vettvangi hefur í för með sér mikil tækifæri, en auk þess skyldur sem leiðandi afl á alþjóðlegum vettvangi.

FÖNIXINN Á FERÐALAGI

Wed, 16 Nov 2011 11:55:00 +0000

Dansleikhússýningin Ferðalag Fönixins, sem frumsýnd var á Listahátíð í vor, hefur farið í leikferð. Í Færeyjum var sýnt í Norðurlandahúsinu fyrir troðfullu húsi við miklar og góðar undirtektir. Síðan var haldið til Finnlands þar sem verkið var sýnt utandyra og án Eivarar. Sýningin fer svo aftur á fjalirnar í Borgarleikhúsinu í vetur og stendur til að ferðast með hana víðar.

EYRARRÓSIN 2012 - UMSÓKNARFRESTURINN ER RUNNINN ÚT

Wed, 16 Nov 2011 10:59:00 +0000

Eyrarrósin, viðurkenning sem veitt er árlega einu afburða menningarverkefni á starfssvæði Byggðastofnunar á landsbyggðinni, verður afhent í byrjun árs 2012. Þetta er í áttunda sinn sem Listahátíð í Reykjavík, Byggðastofnun og Flugfélag Íslands standa að þessari viðurkenningu.

Sjá auglýsingu um umsóknir hér.

SOLARIS KOMIÐ ÚT Á DISKI

Thu, 10 Nov 2011 10:42:00 +0000

Á Listahátíð í vor fluttu Ben Frost og Daníel Bjarnason verk sitt Solaris ásamt Sinfóníettu Krakárborgar. Solaris er samið fyrir þrjátíu strengja- og ásláttarleikara, gítara, rafhljóðfæri og breytt píanó. Við tónlistina var sýnt kvikmyndaverk Brian Eno og Nick Robertson sem byggir á kvikmynd Tarkovskys, Solaris, frá árinu 1972. Nú er verkið komið út á hljómdiski hjá Bedroom Community og hefur fengið góða dóma.

REYKJAVÍK VIÐBURÐA- OG HÁTÍÐABORG

Tue, 1 Nov 2011 11:32:00 +0000

Reykjavíkurborg hefur hlotið heiðurstitil 2011 sem viðburða- og hátíðaborg.

Verðlaunin voru tilkynnt á árlegri ráðstefnu IFEA (International Fetivals & Events Association) þann 3. október síðastliðinn.

AUGLÝST EFTIR UMSÓKNUM UM EYRARRÓSINA

Sat, 22 Oct 2011 10:31:00 +0000

Eyrarrósin er viðurkenning sem er veitt árlega einu afburða menningarverkefni á starfssvæði Byggðastofnunar á landsbyggðinni og er nú auglýst eftir umsóknum um Eyrarrósina 2012.

NORRÆN SAMTÍMALIST LEGGUR UNDIR SIG SÝNINGARSTAÐINA Á LISTAHÁTÍÐ 2012

Fri, 21 Oct 2011 00:00:00 +0000

Listahátíð í Reykjavík í samstarfi við Listasafn Íslands, Listasafn Reykjavíkur, Nýlistasafnið, Norræna húsið og Kynningarmiðstöð íslenskrar myndlistar undirbýr nú umfangsmikið myndlistarverkefni fyrir Listahátíð 2012. Verkefnið hefur hlotið styrk úr norræna sjóðnum Kultur Kontakt Nord og hefur ráðið til sín sýningarstjórann Jonatan Habib Engqvist sem mun stýra verkefninu ásamt verkefnisstjóra, Kristínu Scheving.

FULLTRÚARÁÐSFUNDUR

Thu, 20 Oct 2011 12:38:00 +0000

Á fjölmennum fulltrúaráðsfundi Listahátíðar sem fram fór í Ráðherrabústaðnum 20. október sl. voru fluttar skýrslur formanns stjórnar Listahátíðar, Kjartans Arnar Ólafssonar og Hrefnu Haraldsdóttur listræns stjórnanda.

KLÚBBURINN AFTUR Á SVIÐ

Thu, 20 Oct 2011 10:24:00 +0000

Klúbburinn, dansleikhúsverk sem frumsýnt var á Listahátíð í vor, verður nú tekið aftur til sýninga í Borgarleikhúsinu. Verkið státar af frábærum hópi sex ólíkra listamanna sem vann saman undir stjórn dansarans og danshöfundarins Gunnlaugs Egilssonar.

SÝNINGIN ÍSLENSK SAMTÍMAHÖNNUN HEFUR FARIÐ VÍÐA

Wed, 12 Oct 2011 14:00:00 +0000

Sýningin Íslensk samtímahönnun - húsgögn, vöruhönnun og arkitektúr opnaði fyrst á Listahátíð í Reykjavík á Kjarvalsstöðum í maí 2009. Sýningin er hönnuð sem farandsýning og hefur gert víðreist síðan. Sýningin var sett upp í Tallinn í ágúst í samhengi við Íslands-daginn í Tallinn en hann var haldinn 21. ágúst með mikilli viðhöfn.

FULLKOMINN DAGUR TIL DRAUMA

Fri, 30 Sep 2011 10:41:00 +0000

Anton Lackhy, einn dansaranna úr danshópnum Les Slovaks sem sýndi verkið Opening night á Listahátíð í vor, er höfundur dansverksins Fullkominn dagur til drauma, sem Íslenski dansflokkurinn frumsýnir í kvöld á stóra sviði Borgarleikhússins.