Fréttir

MIKIL ÞÁTTTAKA OG STJÖRNUREGN

Wed, 1 Sep 2010 16:40:00 +0000

Mjög góð aðsókn var á viðburði Listahátíðar í ár sem voru yfir sextíu talsins með þátttöku hátt í sex hundruð listamanna, erlendra sem innlendra. Dagskráin var mjög fjölbreytt með tónleikum kvölds og morgna, stórtónleikum í Laugardalshöll, leikhús- og djassveislu, útileikhúsi fyrir börn og opnun yfir 20 ljósmyndasýninga. Upplestrar og tónleikar fóru fram í vinnustofum myndlistarmanna og á heimilum rithöfunda þar sem hvert sæti var setið. Hafa viðburðir hátíðarinnar hlotið mjög jákvæð viðbrögð áhorfenda og gagnrýnenda, sem lofað hafa dagskrána í ár eins og fjölmargir góðir dómar bera vitni um.

ERLEND UMFJÖLLUN

Wed, 7 Jul 2010 11:00:00 +0000

Í tilefni Listahátíðar í Reykjavík 2010 kom hópur erlendra blaðamanna til Reykjavíkur. Að komu þeirra stóðu auk Listahátíðar; Höfuðborgarstofa, Ferðamálastofa og Útflutningsráð. Meðal fjölmiðla sem blaðamennirnir skrifa fyrir eru bandarísku blöðin The New York Post og Art Newspaper, hið austurríska Der Standard, Art das Kunstmagasin og Financial Times í Þýskalandi, Pohjalainen í Finnlandi og Ritzau fréttastofan í Danmörku.

RAUNVERULEIKATÉKK Á HRINGFERÐ 3. JÚLÍ - 31. ÁGÚST

Tue, 6 Jul 2010 15:59:00 +0000

Listahátíð í Reykjavík hefur undanfarin ár lagt áherslu á að flytja verkefni á dagskrá hátíðarinnar út á landsbyggðina. Árið 2009 voru settar upp fjórar myndlistarsýningar í jafnmörgum vitum í öllum landshlutum og á Listahátíð 2010 verður hluti sýningarinnar Raunveruleikatékk fluttur úr 101 Reykjavík í dreifðari byggðir landsins í samvinnu við Landsvirkjun.

LJÓSMYNDASÝNINGAR OPNAR ÁFRAM

Fri, 2 Jul 2010 15:33:00 +0000

Á Listahátíð í ár var áhersla lögð á ljósmyndir með fjölda ljósmyndasýninga í galleríum, söfnum og á götum úti. Standa flestar þeirra fram á sumar þótt formlegri dagskrá hátíðarinnar sé lokið. Sýningin Raunveruleikatékk verður í miðborginni til 28. júní, þegar hluti hennar verður tekinn niður og færður út á landsbyggðina.

LISTAHÁTÍÐ 2010 LOKIÐ - MIKIL ÞÁTTTAKA OG STJÖRNUREGN

Tue, 8 Jun 2010 10:41:00 +0000

Listahátíð í Reykjavík 2010 lauk um helgina með stórglæsilegri óperuveislu Kristins Sigmundssonar, Sinfóníuhljómsveitar Íslands og Óperukórsins í Reykjavík enda ætlaði lófataki gesta aldrei að linna. Mjög góð aðsókn var á viðburði hátíðarinnar sem í ár voru yfir sextíu talsins með þátttöku hátt í sex hundruð listamanna, erlendra sem innlendra.

AUGLÝST EFTIR FRAMKVÆMDASTJÓRA

Sat, 5 Jun 2010 00:00:00 +0000

Starf framkvæmdastjóra Listahátíðar í Reykjavík var auglýst til umsóknar. Ráðningartími er frá 1. september 2010. Starfið er fólgið í fjölþættum undirbúningi hverrar hátíðar og öðrum þeim verkefnum sem unnin eru á vegum Listahátíðar. Umsóknarfrestur rann út 25. júní 2010.

FRÁBÆRAR VIÐTÖKUR

Fri, 4 Jun 2010 11:34:00 +0000

Nýliðin Listahátíð hlaut frábærar viðtökur og hlutu flestir viðburðir hátíðarinnar afar lofsamlega umfjöllun og stjörnuregn gagnrýnenda. Hér er hægt að lesa brot úr dómum sem viðburðir hátíðarinnar hlutu.

LÍFLEGAR LEIKSÝNINGAR Á LISTAHÁTÍÐ FYRIR ALLA FJÖLSKYLDUNA

Fri, 4 Jun 2010 15:21:00 +0000

Sýningar standa yfir á tveimur leiksýningum á Listahátíð sem hafa hlotið frábærar viðtökur og dóma. Í heimilistækjasirkusnum Af ástum manns og hrærivélar túlka Ólafía Hrönn Jónsdóttir og Kristján Ingimarsson íslensk hjón á óborganlega hátt.
í Hr. Potti og ungfrú Lok eru það búsáhöldin sem lifna við í tónævintýri fyrir alla fjölskylduna, líka þá allra yngstu. Í sýningunni er ástarsaga Hr. Potts og ungfrú Loks sögð með gáskafullum leik og lifandi tónlist, þar sem foxtrott, charleston, djass og tangó koma við sögu.

LOKADAGAR OG LEIÐSAGNIR UM LJÓSMYNDASÝNINGAR

Fri, 4 Jun 2010 15:19:00 +0000

Listahátíð lýkur á laugardaginn en velflestar ljósmyndasýningar á dagskrá hátíðarinnar halda áfram í galleríum og sýningarsölum. Þó lýkur tveimur ljósmyndasýningum um helgina, Fyrirmyndum Ólafar Nordal í Listasafni ASÍ við Freyjugötu og Núna, samsýningu finnskra og íslenskra samtímaljósmyndara í Norræna húsinu.

Á morgun, laugardag, leiðir Guðni Tómasson listsagnfræðingur og útvarpsmaður áhugasama um útiljósmyndasýninguna Raunveruleikatékk og hefst gönguferðin kl. 14 við Nasa á Austurvelli. Á sunnudaginn kl. 14 leiðir Halldór Björn Runólfsson gesti um sýningu Cindy Sherman, Untitled Film Stills, í Listasafni Íslands. Á laugardag frá kl. 13-16 býðst fjölskyldum að smíða sína eigin myndavél í fjölskyldusmiðju á Kjarvalsstöðum, undir leiðsögn Péturs Thomsen. Nánari upplýsingar hér.

LOKATÓNLEIKAR LISTAHÁTÍÐAR LAUGARDAG KL. 17

Wed, 2 Jun 2010 14:17:00 +0000

Lokapunktur Listahátíðar verður settur á laugardaginn klukkan fimm með glæsilegri óperuveislu Kristins Sigmundssonar, Sinfóníuhljómsveitar Íslands og Óperukórsins í Reykjavík.

Þetta eru fyrstu einsöngstónleikar Kristins með Sinfóníunni um árabil, og á efnisskránni eru meðal annars aríur úr Rakaranum í Sevilla, Don Carlo og Hollendingnum fljúgandi. Hátt í tvö hundruð manns taka þátt í tónleikunum, hljómsveitarstjóri er Petri Sakari og kórstjóri Garðar Cortes. Löngu er orðið uppselt á tónleikana.

Við vekjum athygli á tímasetningu tónleikanna, þeir hefjast klukkan 17 í Háskólabíói.

HAMAR, ÍSTAÐ, STEÐJI Á KJARVALSSTÖÐUM 1. JÚNÍ

Mon, 31 May 2010 16:30:00 +0000

Þátttakendur eru Berglind María Tómasdóttir, flautuleikari; Anna S. Þorvaldsdóttir, tónskáld; Daníel Bjarnason, tónskáld; Davíð Brynjar Franzson, tónskáld; Halldór Úlfarsson, hljóðfærahönnuður og myndlistarmaður og Njörður Sigurjónsson, doktor í menningarstjórnun.
Umsjón hefur Elísabet Indra Ragnarsdóttir.

Njúton og Formalist Quartet frumflytja verk Atla Ingólfssonar og ráðast í stórvirki nútímatónbókmenntanna

Mon, 31 May 2010 16:28:00 +0000

Íslenski tónlistarhópurinn Njúton og bandaríski strengjakvartettinn The Formalist Quartet leiða saman hesta sína og frumflytja á Íslandi eitt af stórvirkjum tónlistarsögu 20. aldar; Vortex Temporum eftir franska tónskáldið Gérard Grisey. Tónlist Grisey hefur lítið hljómað á Íslandi en hann er eitt af höfuðskáldum spektraltónlistar. Á tónleikunum verður jafnframt frumflutt nýtt verk eftir Atla Ingólfsson innblásið af Gérard Grisey. Einnig verða tveir strengjakvartettar eftir Úlfar Inga Haraldsson og Nicholas Deyoe fluttir á tónleikunum. Súpuspjall verður á Sólon fyrir tónleikana þar sem Atli Ingólfsson mun fræða gesti um spektraltónlist og hvers vegna tónverk Griseys er talið eitt af meistaraverkum nútímatónbókmenntanna. Spjall Atla hefst kl. 18.00 og tónleikarnir kl. 20.00.

LÍFLEG LISTAHÁTÍÐARHELGI

Mon, 31 May 2010 16:19:00 +0000

Nýliðin Listahátíðarhelgi var stútfull af spennandi viðburðum og bar þar hæst spænsk/marókkósku sveitina Orquesta Chekara Flamenca, sem troðfylltu Íslensku óperuna í gærkvöld og var fagnað með standandi lófataki. Listahátíðargestir áttu margar góðar stundir á húslestrum rithöfunda sem opnuðu heimili sín og garða í góða veðrinu.

LEIÐSÖGN UM RAUNVERULEIKATÉKK Á SUNNUDAG KL. 14

Sat, 29 May 2010 11:13:00 +0000

Listahátíð í Reykjavík opnaði útiljósmyndasýninguna Raunveruleikatékk undir berum himni miðborgar Reykjavíkur þann 15. maí síðastliðinn. Á sunnudaginn mun Jón Proppé listheimspekingur veita leiðsögn um sýninguna og hefst hún kl. 14.00 við steypustanda á Austurvelli (gegnt Nasa).

Raunveruleikatékk skartar verkum eftir Daníel Þorkel Magnússon, Eggert Jóhannesson, Harald Jónsson, Ievu Epnere, Hlyn Hallsson, Ingvar Högna Ragnarsson, Kristleif Björnsson, Libiu Castro og Ólaf Ólafsson, Óskar Hallgrímsson, Silju Sallé og Spessa. Sýningarstjóri er Æsa Sigurjónsdóttir.

HÚSLESTRAR, TÓNÆVINTÝRI, SCHUBERT OG MIÐJARÐARHAFSMÚSÍK

Sat, 29 May 2010 11:08:00 +0000

Það verður án efa heimilisleg og hjartnæm stemning er rithöfundar opna heimili sín fyrir gesti Listahátíðar um helgina. Húslestrar þeirra hefjast á klukkutíma fresti á morgun og hinn og aðeins eru örfá sæti í boði á hvern og einn.

Á laugardag og sunnudag verður frumsýnt í Kúlunni í Þjóðleikhúsinu gáskafullt tónævintýri fyrir börn sem nefnist Herra Pottur og ungfrú Lok. Þar segja fimm hljóðfæraleikarar, jafnmargar brúður og sögumaður frá draumi lítils drengs þar sem áhöldin í eldhúsinu lifna við. Alls eru fjórar sýningar á verkinu um helgina, og þann 3. júní verður sérstök sýning á frönsku.

Hvert sæti verður skipað enda löngu orðið uppselt í Íslensku óperuna á sunnudagskvöld. Orquesta Chekara Flamenca fer með áhorfendur í ferðalag um tónlistarhefð Suður-Spánar og Marokkó, þar sem tónlist beggja landanna fléttast saman við flamencodans.

SCHUBERT SLÆR Í GEGN - LOKATÓNLEIKAR Á SUNNUDAGINN

Fri, 28 May 2010 16:56:00 +0000

Ágúst Ólafsson barítónsöngvari og Gerrit Schuil píanóleikari hafa slegið í gegn með morguntónleikaröð sína í Fríkirkjunni. Enginn íslenskur söngvari hefur áður tekist á við heildarflutning þessara söngflokka og hafa þeir hlotið frábærar viðtökur áhorfenda og lofsamlega dóma fyrir flutning sinn og túlkun. Lokatónleikar Ágústs og Gerrits eru á sunnudaginn klukkan 11.00, þar sem þeir flytja Der Schwanengesang, Svanasöng, en þeir fluttu Malarastúlkuna fögru og Vetrarferðina síðustu tvo sunnudagsmorgna.

ÞÆTTIR OG UPPTÖKUR FRÁ LISTAHÁTÍÐ Í RÍKISÚTVARPINU

Wed, 26 May 2010 16:36:00 +0000

Ríkisútvarpið tekur upp marga af viðburðum Listahátíðar í Reykjavík og hefur einnig gert þeim skil í fjölmörgum þáttum.
Á þessari slóð er safnað saman tónleikum og þáttum sem tengjast Listahátíð í Reykjavík og sem hægt er að hlusta á á netinu.

http://dagskra.ruv.is/listahatid/

LISTAHÁTÍÐ Í KASTLJÓSI ERLENDRA FJÖLMIÐLA

Mon, 24 May 2010 11:59:00 +0000

Í tilefni Listahátíðar í Reykjavík 2010 hefur hópur erlendra blaðamanna dvalið í Reykjavík undanfarna daga. Að komu þeirra standa auk Listahátíðar; Höfuðborgarstofa, Ferðamálastofa og Útflutningsráð. Meðal fjölmiðla sem blaðamennirnir skrifa fyrir eru bandarísku blöðin The New York Post og Art Newspaper, hið austurríska Der Standard, Art das Kunstmagasin og Financial Times í Þýskalandi, Pohjalainen í Finnlandi og Ritzau fréttastofan í Danmörku.

FRÁBÆRIR VIÐBURÐIR UM HELGINA

Fri, 21 May 2010 18:37:00 +0000

Um helgina verður margt að gerast á Listahátíð. Harmónikkuæringinn Kimmo Pohjonen heldur tónleika í kvöld, 21. maí, kl. 21 í NASA. Kimmo fer ótroðnar slóðir í tónlistarsköpun sinni og opnar nýjar víddir fyrir áhorfendum í harmónikkuleik. Á laugardag og sunnudag verða haldnir 12 vinnustofutónleikar vítt og breitt um borgina. Þar gefst gestum færi á að hlýða á ýmiss konar tónlist í vinnustofum myndlistarmanna. Hér er hægt að lesa meira um þessi skemmtilegu stefnumót.

RAUNVERULEIKATÉKK Í MIÐBÆNUM

Tue, 18 May 2010 00:17:00 +0000

Glöggir vegfarendur hafa rekið augun í ljósmyndir sem prýða ýmis grindverk og veggi miðborgar Reykjavíkur. Þarna er að finna ljósmyndir af sýningunni Raunveruleikatékk á Listahátíð í Reykjavík og opnuð var síðastliðinn laugardag með leiðsögn Æsu Sigurjónsdóttur um sýninguna.

MIÐASALA LISTAHÁTÍÐAR

Sun, 16 May 2010 13:19:00 +0000

Miðasala er á www.listahatid.is,
í síma 552 8588 og á skrifstofu hátíðarinnar í Gimli, Lækjargötu 3.
Opnunartímar yfir hátíðina, 12. maí - 5. júní, eru sem hér segir:
Virka daga 10-16 og á viðburðunum.
Laugardaga, sunnudaga og helgidaga 12-16 og á viðburðunum.
Miðasala og afhending greiddra miða flyst á viðburðastaði klukkustund áður en viðburður hefst.
Ekki er hægt að kaupa miða á netinu síðustu tvo tímana fyrir viðburð.
Símanúmer miðasölustjóra er 898-9981.

TAKTU HELGINA FRÁ - SJÁUMST Á LISTAHÁTÍÐ

Sat, 15 May 2010 00:09:00 +0000

Miðborgin ólgar af lífi um helgina, sem er stútfull af spennandi viðburðum. Hátíðargestir eru sérstaklega boðnir velkomnir á opnun útiljósmyndasýningarinnar Raunveruleikatékk á laugardaginn kl. 13 en sýningin er opnuð með leiðsögn Æsu Sigurjónsdóttur sýningarstjóra og hefst hún við Landsímahúsið við Austurvöll.

LISTAHÁTÍÐ SETT

Wed, 12 May 2010 13:26:00 +0000

Á setningu Listahátíðar í Listasafni Reykjavíkur, Hafnarhúsi í dag var fluttur margbrotinn gjörningur Helenu Jónsdóttur í flutningi um 60 íslenskra listamanna og ljósmyndainnsetning David Byrne í gluggum Hafnarhúss var opnuð formlega. Hrefna Haraldsdóttir, stjórnandi hátíðarinnar flutti ávarp og Hanna Birna Kristjánsdóttir borgarstjóri setti hátíðina.

ÞÆTTIR UM LISTAHÁTÍÐ Á RUV

Tue, 4 May 2010 13:43:00 +0000

Síðastliðið sunnudagskvöld var hinn árlegi þáttur Listahátíðar í Reykjavík frumsýndur en þar var dagskrá hátíðarinnar kynnt ítarlega af Felix Bergssyni. Þeir sem misstu af þættinum þurfa ekki að örvænta því endursýningar eru fyrirhugaðar miðvikudaginn 5. maí kl. 00.25 og sunnudaginn 9. maí kl. 13.50, strax á eftir Silfri Egils. Um dagskrárgerð sá Jón Egill Bergþórsson.

LISTAHÁTÍÐ Í SJÓNVARPINU Á SUNNUDAGSKVÖLD

Fri, 30 Apr 2010 15:48:00 +0000

Í Sjónvarpinu á sunnudagskvöld er kynningarþáttur um Listahátíð í Reykjavík. Þar kynnumst við nánar erlendum listamönnum sem koma á hátíðina í vor, kíkjum á æfingar vítt og breitt um borgina og fáum forsmekk af fjölbreytilegum atriðum.
Ekki missa af kynningarþætti Listahátíðar á dagskrá Sjónvarpsins sunnudagskvöldið 2. maí klukkan 19.35.

DAGSKRÁ HÁTÍÐARINNAR DREIFT Í HÚS - SKOÐIÐ BÆKLINGINN HÉR

Sun, 25 Apr 2010 00:18:00 +0000

Dagskrárbæklingi Listahátíðar í Reykjavík er dreift í hús í dag miðvikudaginn 28. apríl. Þeir sem ekki geta beðið eftir að skoða hann geta hlaðið niður rafrænni útgáfu hans hér . Á forsíðu bæklingsins er einkennismynd Listahátíðar í ár, Afi, eftir ljósmyndarann Friðgeir Helgason.

HÚSLESTRAR OG VINNUSTOFUTÓNLEIKAR

Wed, 31 Mar 2010 12:08:00 +0000

Í fyrra var í fyrsta sinn efnt til á Listahátíð lítilla en mjög vinsælla viðburða, húslestra og stofutónleika í miklu návígi listamanna og gesta. Við höldum áfram á þeirri braut, húslestrarnir verða heima í stofu hjá höfundunum. Í ár verða stofutónleikarnir í formi vinnustofutónleika og fara fram á vinnustofum myndlistarmanna.

HAGSTÆTT MIÐAVERÐ Á LISTAHÁTÍÐ

Wed, 31 Mar 2010 11:55:00 +0000

Í fyrra var aðsókn á viðburði Listahátíðar einstaklega góð þrátt fyrir óvissuástand og þar skipti máli hagstætt miðaverð. í vor höldum við uppteknum hætti, miðaverð á Listahátíð er með því allra besta sem býðst og kosta frá eitt til um fimm þúsund krónur. Skoða alla viðburði hér

MIÐASALA RÝKUR AF STAÐ

Wed, 31 Mar 2010 11:43:00 +0000

Miðasala á viðburði Listahátíðar í Reykjavík hófst í gær að loknum blaðamannafundi þar sem dagskrá hátíðarinnar var kynnt. Miðasalan tók strax kipp og er ljóst að fólk ætlar ekki að missa af þeim frábæru viðburðum sem verða á hátíðinni í vor. Sjá alla viðburði hér.

LIST FJALLAR UM LJÓSMYNDASÝNINGAR

Tue, 30 Mar 2010 15:44:00 +0000

Ítarleg umfjöllun um ljósmyndasýningar Listahátíðar í Reykjavík er í mars útgáfu af LIST, Icelandic Art News. Jón Proppé fjallar um þær sýningar sem eru á dagskrá hátíðarinnar í vor.