Eyrarrósin afhent á Bessastöðum

6/1/2006

Eyrarrósin, sérstök viðurkenning fyrir framúrskarandi menningarverkefni á landsbyggðinni, var afhent á Bessastöðum föstudag 13. janúar og er það í annað sinn sem viðurkenningin er veitt. Þrjú verkefni voru tilnefnd úr hópi fjölmargra umsækjenda. Eitt þeirra hlaut Eyrarrósina; fjárstyrk að upphæð kr. 1.5 milljón og verðlaunagrip eftir Steinunni Þórarinsdóttur til eignar og hin tvö hljóta 200 þúsund króna framlag, sem eru eftirstöðvar af Menningarborgarsjóði. Öll verkefnin hljóta að auki tíu flugferðir frá Flugfélagi Íslands. Verðlaunin afhenti Dorrit Moussaieff forsetafrú, sem jafnframt er verndari Eyrarrósarinnar. Tilnefnd til Eyrarrósarinnar 2006 eru: Jöklasýning á Höfn í Hornafirði, Kórastefna við Mývatn, LungA – listahátíð ungs fólks, Austurlandi. (sjá nánar um verkefnin neðar í greininni) Fyrir réttu ári féllu verðlaunin í skaut Þjóðlagahátíðarinnar á Siglufirði en þá voru einnig tilnefnd verkefnin Aldrei fór ég suður; rokkhátíð alþýðunnar á Ísafirði og Listahátíðin á Seyði á Seyðisfirði. Eyrarrósin á rætur sínar í því að fyrir um tveimur árum síðan gerðu Listahátíð í Reykjavík, Byggðarstofnun og Flugfélag Íslands með sér samkomulag um eflingu menningarlífs á landsbyggðinni. Markmiðið með Eyrarrósinni er að stuðla að auknu menningarlífi á landsbyggðinni, auka kynningarmöguleika einstakra sveitarfélaga og landshluta og skapa sóknarfæri á sviði menningartengdrar ferðaþjónustu. Eyrarrósin er veitt einu afburða menningarverkefni á starfssvæði Byggðarstofnunar. Auglýst var eftir umsóknum í fjölmiðlum og voru umsækjendur m.a. tímabundin verkefni og menningarhátíðir, stofnanir og söfn. Verkefnisstjórn, skipuð forstjóra og stjórnarformanni Byggðarstofnunnar og stjórnanda og framkvæmdastjóra Listahátíðar í Reykjavík, tilnefna og velja verðlaunahafa. Nánar um verkefnin: Jöklasýning á Höfn í Hornafirði Fjölbreytt og metnaðarfullt verkefni, þar sem stefnt er saman fjölmörgum aðilum og stofnunum á sviði vísinda, menningar og ferðaþjónustu. Sýningin byggir á sérstöðu landsvæðisins og sögu þess, auk þess sem fremstu vísinda- og háskólastofnanir landsins á þessu sviði koma að uppbyggingu hennar og framkvæmd. Kórastefna við Mývatn Afar vandað tónlistarverkefni með mikilli þátttöku innlendra og erlendra kóra, auk þess sem tónlistarmenn úr nágrannasveitum taka þátt í því. Byggt á langri hefð í byggðarlaginu og framkvæmdin einkennist af miklum metnaði og þrautseigju. Gott samstarf við fjölda aðila á svæðinu og sívaxandi þátttaka langt út fyrir það sýnir að verkefnið á mikla framtíð fyrir sér. LungA – listahátíð ungs fólks, Austurlandi Einkar litrík menningarhátíð ungs fólks í tengslum við listahátíðina Á seyði. Listrænn metnaður og afar fjölbreytt dagskrá með þátttöku innlendra sem erlendra listamanna dregur athygli að staðnum. Myndlist, tónlist, sirkus og útiviðburðir tvinna saman skemmtilega dagskrá, sem höfðar til fjölmenns hóps heimamanna og gesta.

Senda grein