Færeyska óperan Í ÓÐAMANSGARÐI tilnefnd til Grímunnar
Tónlist Sunleif Rasmussen í óperunni Í Óðamansgarði og lýsing Lárusar Björnssonar eru tilnefndar til Grímunnar, íslensku leiklistarverðlaunanna sem afhent verða í Borgarleikhúsinu 16. júní. Óperan var sett upp í nýrri sviðsetningu Listahátíðar í Reykjavík, Tjóðpallsins í Færeyjum og Þjóðleikhússins á Listahátíð 2009 og voru sýningarnar alls tvær.
Í Óðamansgarði er fyrsta færeyska óperan. Hún var frumsýnd í Þórshöfn haustið 2006 en höfundur hennar, Sunleif Rasmussen, hlaut Tónlistarverðlaun Norðurlandaráðs árið 2002. Óperan byggir á samnefndri smásögu Williams Heinesen úr smásagnasafninu Fjandinn hleypur í Gamalíel.
Hugmyndin að óperunni kviknaði árið 2001 þegar meðlimir tónlistarhópsins Aldubáran skoruðu á Sunleif Rasmussen að skrifa óperu. Hann tók áskoruninni og fékk Dánial Hoydal til þess að skrifa líbrettó. Ljóð- og myndræn saga Heinesen reyndist tilvalið efni í óperu. Sagan á sér hvorki tíma né rúm, heldur hverfist um brjálæðinginn ógurlega sem er einbúi. Helstu sögupersónurnar eru Marselius og Stella; par á unglingsaldri sem veltir því stöðugt fyrir sér hver sé saga brjálæðingsins. Býr hann yfir yfirnáttúrulegum mætti? Er hann yfirleitt til? Kjarninn í þessum spurningum, og svörunum við þeim, fær unga fólkið til þess að skoða sig sjálf og samband sitt í nýju ljósi.
Íslenskir og færeyskir listamenn tóku þátt í sýningunni. Til gamans má geta þess að leikmyndahönnuður sýningarinnar er Elisa Heinesen, barnabarn Williams Heinesen.
Aðstandendur sýningarinnar og flytjendur:
Tónlistarhópurinn Aldubáran, skipaður færeyskum og íslenskum tónlistarmönnum
Höfundur: Sunleif Rasmussen
Líbrettóhöfundur: Dánial Hoydal
Leikstjóri: Ria Tórgarð
Hljómsveitarstjóri: Bernharður Wilkinson
Danshöfundur: Lára Stefánsdóttir
Söngvarar: Eyjólfur Eyjólfsson, tenór, Þóra Einarsdóttir, sópran og Bjarni Thor Kristinsson, bassi.
Dansarar: Frank Fannar Pedersen, Unnur Elísabet Gunnarsdóttir
Leikarar: Gunnvá Zachariasen og Hans Tórgarð
Aldubáran skipa: Andrea Heindriksdóttir, flauta, Eydís Franzdóttir, óbó, Àrmann Helgason, klarinett, Christina Andersen, básúna, Stefán Jón Bernharðsson, franskt horn, Johan Hentze, trompet, Andras Olsen, básúna, Òlavur Jakobsen , gítar, Jóhannes Andreasen hljóðgervill (Hljómborð), Matias Siebeck, gítar, Sámal Petersen, fiðla, Jón Festirstein, fiðla, Angelika Nielsen lágfiðla, Tóri Restorff Jacobsen, selló, Agnar Lamhauge, kontrabassi.