Gennadij Rosdestvenskij og Sinfóníuhljómsveit Íslands

Miðasala hjá Sinfóníuhljómsveit Íslands, á sinfonia.is / midi.is eða í síma 545 2500

Hljómsveitarstjóri: Gennadij Rosdestvenskij

Einleikari: Viktoría Postnikova

Efnisskrá: W.A. Mozart: Píanókonsert í c-moll, K. 491

Dímítríj Sjostakovitsj: Sinfónía nr. 7 (Leníngrad-sinfónían)

Gennadij Rosdestvenskij hefur verið einn fremsti hljómsveitarstjóri Rússlands í næstum hálfa öld og vakið eftirtekt um allan heim fyrir sérstæðan stjórnunarstíl sinn. Hann var aðalstjórnandi Bolshoi-óperunnar í Moskvu um árabil og var náinn samstarfsmaður Sjostakovitsj og Prokofieffs, sem tileinkuðu honum verk sín. Hann heldur fáa tónleika á hverju ári og því er það stórviðburður í hvert sinn sem hann stígur á stjórnandapallinn. Það er enn fremur sérstakt ánægjuefni að á þessum fyrstu tónleikum meistarans á Íslandi hyggist hann stjórna Leníngrad-sinfóníu Sjostakovitsj, sem var samin á þeim miklu hörmungatímum þegar Þjóðverjar sátu um Leníngrad í 900 daga og um milljón manns lét lífið úr hungri, kulda og sprengjusárum.

Einleikari á tónleikunum er Viktoría Postnikova, sem hefur verið í fararbroddi rússneskra píanósnillinga um áratuga skeið. Hún hefur hljóðritað öll píanóverk Tsjajkovskíjs og Mússorgskíjs og hvarvetna hlotið frábæra dóma fyrir leik sinn. International Piano Magazine segir um Postnikovu: „Hún hefur ótrúlegt ímyndunarafl og skilning á tónlistinni og píanótækni hennar er fullkomin: fáguð, fíngerð, en einnig rússnesk og skapmikil þar sem það á við.“ Þess má geta að Postnikova er eiginkona Rosdestvenskíjs.

Píanókonsertarnir sem Mozart samdi í Vínarborg á hátindi ferils síns eru meðal helstu meistaraverka hans og áttu sinn þátt í því að gera píanókonsertinn að gjaldgengu formi í tónleikasölum heimsins. Einn sá fremsti er c-moll konsertinn K. 491, sem er bæði dramatískur og leyndardómsfullur, og sýnir bæði tjáningarríka og einlæga hlið þessa mikla meistara tónanna.

Þjóðverjar réðust inn í Sovétríkin 22. júní 1941, og þremur mánuðum síðar var Leníngrad umkringd á alla vegu. Skömmu síðar hóf Dímítríj Sjostakovítsj að semja Leníngrad-sinfóníuna, sem er ein stærsta sinfónía hans og stórmerkilegt verk hvernig sem á það er litið. Haft er eftir tónskáldinu sjálfu að sinfónían sé ekki eingöngu um umsátur Þjóðverja, heldur um „borgina sem Stalín lagði í rúst, þó svo að Hitler hafi rekið smiðshöggið á eyðilegginguna.“ Tónlistin er áhrifamikil og á köflum hádramatísk lýsing á ástandinu, með „innrásarstefinu“ fræga í fyrsta þætti sem táknar hersveitirnar sem nálgast óðfluga. Að lokum eru það þó borgarbúar sem standa uppi sem sigurvegarar og sinfóníunni lýkur á björtum og rismiklum kafla með glaðlegu yfirbragði.

Tónleikarnir eru um 2 tímar með hléi.