Anne Sofie Von Otter, ein af dáðustu söngkonum samtímans, er jafnvíg á óperusöng, ljóðasöng og barokkmúsík. Geisladiskar hennar eru margverðlaunaðir og hún hefur margsinnis hreppt Grammyverðlaunin.

Kvartettinn Pacifica er talinn einn allra fremsti kvartett Bandaríkjanna í dag og hefur hvarvetna vakið feiknalega athygli. Dómar sem kvartettinn hefur fengið eru sérlega glæsilegir.

Tónleikar með Garth Knox víóluleikara og víóluleikurum úr Sinfóníuhljómsveit Íslands verða á Listahátíð í samvinnu við Víólufélag Íslands. Á tónleikunum verða m.a. frumflutt ný verk eftir Daníel Bjarnason, Hafliða Hallgrímsson og Garth Knox.

Það hefur verið fullyrt um hinn mikla meistara víólunnar Yuri Bashmet, sem leikur með Sinfóníuhljómsveit Íslands á tónleikum, að hann sé án efa einn mesti tónlistarmaður samtímans. Á efnisskránni eru verk eftir Benjamin Britten, Dmitri Shostakovich, Franz Schubert og fleiri.

Sýning Cirque, sem nefnist “The Story of Auguste”, hefur allt að geyma sem prýðir skemmtilegan sirkus, bæði sjónhverfingar og loftfimleika, en er að sama skapi mikil leiksýning sem sögð er höfða til allra sex skilningavitanna.

Listahátíð í samvinnu við Íslenska dansflokkinn býður upp á sýningar þriggja úrvals dansflokka frá Finnlandi, Tékklandi og Frakklandi. Sýningarnar eru hluti af Evrópuverkefninu Trans Danse Europe 2003-2006. Fyrsta sýningin er frá Frakklandi, Rialto Nomade Fabrik.

Tónlistarmaðurinn Barði Jóhannsson, sem við þekkjum úr Bang Gang, og söngkonan Keren Ann sem gerir það gott í Frakklandi um þessar mundir mynda dúettinn Lady and Bird.

Portúgalska fado-söngkonan Mariza kemur með fjölmenna hljómsveit með sér.
Mariza er fædd í Mósambík en ólst upp í Lissabon þar sem foreldrar hennar ráku veitingahús sem frægt var fyrir fado-tónlist. Mariza var byrjuð að syngja fado fimm ára gömul, en sem táningur söng hún aðallega blús, djass og fönk. Áhugi á fado kviknaði svo hjá henni eftir tvítugt og síðan hefur hún helgað sig hefðinni.

Stomu Yamsh’ta sem er fæddur árið 1947 í Kyoto, er einn þekktasti ásláttarleikari heims og sagður hafa breytt ímynd slagverksins. Hann mun af þessu tilefni flytja með sér til landsins hljóðfæri sem búið er til úr þriggja milljón ára gömlum steinum og vegur um eitt tonn.

Glæný leikrit eftir fjóra þýska höfunda hafa verið þýdd á íslensku og verða kynnt fyrir almenningi með leiklestrum á nýja sviði Borgarleikhússins. Leikarar Leikfélags Reykjavíkur og nemendur leiklistardeildar LHÍ flytja. Höfundarnir fjórir, þau Marius von Mayenburg, Ingrid Lausund, Falk Richter og Theresia Walser, verða viðstaddir og á eftir verður boðið upp á umræður.

„Mynd á þili“ heitir sýningin sem Þjóðminjasafn Íslands efnir til. Nafnið er sótt í kvæði Jóns Helgasonar „Áfanga“ en þar lýsir Jón fornum atburðum og stöðum er birtust honum í minningunni „eins og mynd á þili“.

Við landamæri Mongólíu liggur fyrrum ráðstjórnarlýðveldið Tuva. Þaðan koma einhverjir sérstæðustu tónlistarmenn heims, Huun Huur Tu, en meðlimir hljómsveitarinnar eru meistarar í svokölluðum barkasöng.

Í fyrsta sinn í aldarfjórðung verða sónötur Beethovens fyrir píanó og fiðlu fluttar á Íslandi. Flytjendur eru Sigrún Eðvaldsdóttir konsertmeistari Sinfóníuhljómsveitar Íslands og Gerrit Schuil píanóleikari.