Copyright-Fridrik-orn-Ragnar-Kjartansson-Dagsbrun

Eyrarrósin

Opnað hefur verið fyrir umsóknir um Eyrarrósina 2013

eyrarrosin

Eyrarrósin, viðurkenning fyrir framúrskarandi menningarverkefni á starfssvæði Byggðastofnunar,  verður veitt í níunda sinn í febrúar árið 2013. Það eru Byggðastofnun, Flugfélag Íslands og Listahátíð í Reykjavík sem staðið hafa saman að verðlaununum  frá upphafi árið 2005. Markmið Eyrarrósarinnar er að beina sjónum að og hvetja til menningarlegrar fjölbreytni, nýsköpunar og uppbyggingar, á sviði menningar og lista.  Umsækjendur  um Eyrarrósina geta meðal annars verið stofnun, tímabundið verkefni, safn eða menningarhátíð. Valnefnd, skipuð fulltrúum Byggðastofnunar, Listahátíðar í Reykjavík og Flugfélags Íslands ásamt einum menningarfulltrúa á starfssvæði Byggðastofnunar; tilnefnir þrjú verkefni og hlýtur eitt þeirra Eyrarrósina.

Verðlaunaféð hefur verið hækkað og hlýtur handhafi Eyrarrósarinnar 1.650.000 krónur og flugferðir frá Flugfélagi Íslands. Aðrir tilnefndir hljóta 300.000 krónur auk flugferða. Dorrit Moussaieff forsetafrú, verndari Eyrarrósarinnar, afhendir verðlaunin.

UMSÓKNUM SKAL FYLGJA:

  • Lýsing á verkefninu
    Lögð skal fram greinargóð lýsing á verkefninu, umfangi þess, sögu og markmiðum.
  • Tíma- og verkáætlun
    Gera skal grein fyrir stöðu og áætlaðri framvindu verkefnisins og áformum á árinu 2013. Skilyrði er að verkefninu hafi nú þegar verið hleypt af stokkunum.
  • Upplýsingar um aðstandendur
    Lagðar skulu fram ítarlegar upplýsingar um helstu aðila sem að verkefninu standa og grein gerð fyrir þeirra þætti í því.
  • Fjárhagsáætlun
    Tilgreina skal tekjur og gjöld verkefnisins á þessu ári. Uppgjör ársins 2011 fylgi umsókn.

Ef umsókn fylgja ekki ofangreindar upplýsingar verður hún ekki tekin til greina. Úthlutunarnefnd tilnefnir þrjú verkefni úr hópi umsækjenda um Eyrarrósina 2013. Eitt þeirra hlýtur viðurkenninguna, 1.650.000 kr. Hin tvö hljóta 300.000 kr. og auk þess fá öll þrjú tilnefndu verkefnin flugmiða með Flugfélagi Íslands.

Umsóknarfrestur er til miðnættis 7. janúar 2013 og verður öllum umsóknum svarað. Umsóknir skal senda rafrænt til Listahátíðar í Reykjavík á netfangið [email protected]

Allar nánari upplýsingar er hægt að fá á skrifstofu Listahátíðar  í síma 561-2444.

 

 Verðlaunahafar Eyrarrósinnar:
 2005      Þjóðlagahátíðin á Siglufirði
 2006      LungA, Listahátíð ungs fólks á Austurlandi
 2007      Stranda­galdur á Hólmavík
 2008      Rokkhátíð alþýðunnar; Aldrei fór ég suður
 2009      Landnámssetur Íslands
 2010      Bræðslan á Borgarfirði eystra
 2011      Sumartónleikar í Skálholtskirkju
 2012      Safnasafnið á Svalbarðsströnd

                      Byggðastofnun                                                Flugfélag Íslands